Ko te toi te aro, ko te oranga tonutanga o te reo te whai
Ko Toi Ora Initiative (TOI) tētahi manatōpū ka whakatairanga, ka poipoi, ka akiaki hoki i te tukuna ihotanga o te reo. Ka pukumahi a TOI ki te hoahoa me te hanga i ētahi hōtaka auaha ko te toi me te reo Māori ngā aronga i ngā rohe o te iwi o Rangitāne, o Raukawa-ki-te-tonga hoki.
Kaiwhakahaere & Kaiako
KARANGAWAI MARSH
Kaiwhakahaere & Kaiako
TANIA TE TAU
Te Kōmiti Matua o T.O.I
He kōmiti matua, he kaitautoko, he kaiwhakahaere, he kaiako, he kaiāwhina ka whakakanohi i te whānau o RaRau mai ki te manatōpū o T.O.I. Kei raro iho nei tētahi tūtohi e whakaatu ana i ngā mema me ā rātau kawenga ā mohoa nei.
Tiamana nō mai, mai!
TANU AUMUA
Hekeritari nama tahi
HEMI PORTER
Pūkoro hōhonu
TE RINA MARSH
Kerēwatiki whara
WAWARO TE WHAITI
Ko te pae tawhiti e aruhia ana ko te whakatūnga o tētahi whare reo Māori i Te Papaiōea ka whakatairanga i te kōrerotia o te reo Māori ao noa, pō noa, puta noa i te takiwā. Ko tā TOI he whai kia whakaratoa ngā kaupapa reo Māori kounga mā ngā whānau, ngā tamariki, ngā mātua me ngā kaumātua i tētahi ao ngangahau, ao auaha hoki ka mutu, i tētahi ao reo Māori.
Ngā mātāpono o TOI
Kia arohanuitia te reo Māori
-
E kore te whakarauoratanga me te arohanuitia o te reo Māori e ea i te ako noa i te reo Māori me ētahi āhuatanga o te ao Māori. E kore hoki e ea mā te tuku i tō tamaiti ki tētahi kaupapa rumaki mō tētahi wā poto. E rima ngā ariā matua ka kawe i te whakarauoratanga o te reo Māori. I te reo Pākehā, ko SUCCA tana kupu rāpoto (Status, Use, Critical Awareness, Corpus, Acquisition), i te reo Māori, e aua, heoi anō anei ōna mata: te whakatairanga i te MANA o te reo Māori; te KŌREROTIA o te reo Māori e wai rānei, ki hea rānei, ia te rā, kia rere i te takiwā; te MĀRAMA PŪ ki te ora o te reo Māori; te PUNA o te reo me te tōngakingaki o te tangata ki te noho hei kaiutuutu i te puna; te AKONA o te reo mā roto mai i te whakaako, te ako me te whakawhanake hoki.
Kia manawanui, tētahi ki tētahi
-
Mā ngā whānau te kaupapa TOI. Mā te whakaatu i te manawanui o tētahi ki tētahi, pakeke mai, tamariki atu, e whakaū, e whakamau hoki i te haumarutanga o te ako me te tiritiri.
Kia ngākau whakaute ki ngā mahi a ētahi atu
-
E kore rawa te auahatanga e whakataiapatia. I tā tātou kaupapa o TOI ka akiaki tātou i te auahatanga o te tangata, i te whakaute hoki o tētahi ki tētahi me āna hanga.
Nō tātou te wāhi, mā tatou te wāhi
-
Ko te whare hei whakaruruhau i ā tātou mahi ako auaha me ā tātou mahi tiritiri. Nā reira, mōkori anō kia whakamanatia tō tātou whare me ōna rawa pēnei i tā tātou pēnā i ō tātou kāinga ake.
Kia ngākau māhaki
-
Ka kapia i te ‘ngākau māhaki’ ngā āhuatanga o te rangimarie, te hūmarie, te manaaki tangata me te kotahitanga. He mea whakatairanga ēnei uara kia pai ai te toitūtanga o te ngākau pono o TOI.